پروانه سایاق بیر گوزلین شمعینه یاندیم
ایللر بویو من یاتمیشیدیم تازه اویاندیم
مژگانین او خون قویدو کمان قاشینا آتدی
دیدی اوره یی یاره له دی من یارالاندیم
مجنونیله لیلانی من افسانه بیلیردیم
فرهادین اوداغ یارماغینا ایندی ایناندیم
حلاج انالاحق دئینن داره چکیلدی
بوفلسفه نی عشقی انالحقی ده قاندیم
ایلهام و ئریت عشق منه قول قاناد آچدیم
پرواز ائله مک عشقینه دوشدوم هاوالاندیم
مکتبدن آلان درسلری بی فایده گوردوم
علمی سه طلاق ائیله یوبن عقلی ده داندیم
بیرکورقوشودوم خسته و آواره گزیردیم
ناگه منی صید ائیله دی صیاد دایاندیم
+ نوشته شده در پنجشنبه دهم اسفند 1385ساعت توسط رحيم کاويان
|
((عاشقم عاشق برویت گر نمی دانی بدان ))
((سوختم در آرزویت گر نمی دانی بدان ))
عاشقم ای گلعذاریم بیلمیسن گر بیل گیلن
حسرتنده چیخدی جانیم بیلمیسن گر بیل گیلن
قوی منی زنجیره چکسین فیرتینا سالسین رقیب
کویون اولدو سیرگاهیم بیلمیسن گر بیل گیلن
سن قولاق وئرمه رقیبه بیل سوزوم سوزدور منیم
یوخدور آرارم و قراریم بیلمیسن گر بیل گیلن
گرقدم قویسان مزاریم اوسته عطرین آنلاسام
من دیریللم فتنه کاریم بیلمیسن گر بیل گیلن
هئچ بلیرسنمی نه دن کونلوم سنین کویوندادیر
باغلامیش زلفین نیگاریم بیلمیسن گر بیل گیلن
گر رقیبیم اولسه غمدن یا حسددن اولسا کور
بوسه آلماقدیر خیالیم بیلمیسن گر بیل گیلن
هئچ بیلیرسن کی بو لاهوتی نئچون آواره دیر
عاشقم ای گلعذاریم بیلمیسن گر بیل گیلن
+ نوشته شده در پنجشنبه هفتم دی 1385ساعت توسط رحيم کاويان
|
قالـديرين گويلره باريشن بايــراغـين
صلــح ايـله يـاشـاسيـن بـوتون انسـانلار
آنـا لارگـورمه سـين بـالانـين داغـين
صلـح ايـله يـا شاسـين بوتون انسـانلار
***
ازلـدن انسانلاريـارانيـب يـولـداش
يـولـداشـين گوزونـدن تـوکولمه سـين يـاش
قـوشـوندا يـوواسـي پـوزولمـاسـين کـاش
صلـح ايلـه يـا شاسـين بـوتون انسـانلار
***
دوپ- دورو بـولاغـي کيـم بـولاونديرير؟
يـام - يـاشيـل مئشـه ني کيـم لـريانديرير؟
اينـدي اسـيرلـرده زنجــيري قـيريــر
صلـح ايـله يـا شـاسـين بـوتـون انسـانلار
***
محــو اولسـون بمبـلاريـئرکـوره سينـده
آغ قـوشـلار قـالمـاسين دار قفسينـده
سئـوگي هـوسينـده ، يـار هـوسينـده
صلـح ايـله يـا شاسـين بوتون انسانـلار
+ نوشته شده در پنجشنبه نهم آذر 1385ساعت توسط رحيم کاويان
|
غم گلدی منی ائیله دی دریا ٬ یاشاسین غم
بیر لحظه منی قویمادی تنها ٬ یاشاسین غم
دولدوردو منی یاریله اغیاری اونوتدوم
واریلیق داها عشق اولدو سراپا٬یاشاسین غم
کولگه م کیمی آرخامجا گلیر هر سحر آخشام
منلن دوغولوب غصه ده گویا٬ یاشاسین غم
هر دن یاش اولوب گوزلریمی ایسلادیر آنجاق
هردن گتیریر باشیما سئودا٬ یاشاسین غم
آی سیز گئجه لر تک منه همدم غم اولوبدور
اونسوز یاشاماقدا اولور آیا؟ یاشاسین غم
گل گور نئجه دار اوسته اناالحق دئیرم من
غم وئردی منه جرا افشا٬ یاشاسین غم
سوز اولماسا سوزده اوره یه یول تاپا بیلمز
دردی٬ المی ائیلمه مه حاشا٬ یاشاسین غم
ساقی قادان آللام بئله می لر منه نئیلر؟
من غم داغییام وئر منه دریا٬ یاشاسین غم
عشقین غمی شیریندی بوتون غملر ایچینده
عشق اهلینه آیدیندی معما٬ یاشاسین غم
+ نوشته شده در پنجشنبه دوم آذر 1385ساعت توسط رحيم کاويان
|
دی گوروم بو نه سفر دیر
جانیم انّْه گوزوم انّْه
بو تئزلیکده نه خبر دیر
جانیم انّْه گوزوم انّْه
نه باخیر سان یانی یانی
اولوم گوزلرون قوربانی
یولوموزدا قویدون جانی
جانیم انّْه گوزوم انّْه
ائو ائیشیگی غم آلیبدیر
هامونو درده سالیبدیر
یترین بوردا بوش قالیبدیر
جانیم انّْه گوزوم انّْه
سنسیز هارا گئیدیم هارا
غم لر چکیر منی دارا
گوندوزوم گوزومده قارا
جانیم انّْه گوزوم انّْه
سنسیز دنیا منه زندان
اوره گیم اولوبدور آل قان
بو جانیمدا سنه قوربان
جانیم انّْه گوزوم انّْه
ایشیم آه - زار اولوبدور
دنیا منه دار اولوبدور
سنسیر گول لر خار اولوبدور
جانیم انّْه گوزوم انّْه
قوربان اولوم گوز قاشینا
دور هامینی ییغ باشینا
قویما قالاق اوز باشینا
جانیم انّْه گوزوم انّْه
دنیادا اوزون گولمه دی
هیچ کیمسه دردین بیلمه دی
آخر دردین دوزلمه دی
جانیم انّْه گوزوم انّْه
دردی درد اوسته قالادین
اوزون غمه چولقالادین
آخیر سیندی قول قانادین
جانیم انّْه گوزوم انّْه
اوره گیمده یوخدور دوزوم
بو درده من نئجه دوزوم
بیر اولوب گئجه گوندوزوم
جانیم انّْه گوزوم انّْه
شبستره گلنمیریم
گوز یاشیمی سلنمیرم
آخیر سنی گورنمیرم
جانیم انّْه گوزوم انّْه
گولشندن بیر گولوم گئتدی
گول اوستن بولبولوم گئتدی
آرخام گئتدی دیلیم گئتدی
جانیم انّْه گوزوم انّْه
بو درد اوره گیمی داغلار
انّْه دئیر رحیم آغلار
یارامی داهاکیم باغلار
جانیم انّْه گوزوم انّْه
+ نوشته شده در دوشنبه بیست و نهم آبان 1385ساعت توسط رحيم کاويان
|
کاغیذ دریاله نیر سندن یازاندا
قلم غراله نیر ٬ سندن یازاندا
خزان وورموش٬سارالمیش یاسمن لر
تازاشدان گوللنیر٬سندن یازاندا
دولور احساسیله شوریله شعریم
غزل معناله نیر ٬ سندن یازاندا
نه حکمت وار او یاشیل گورلرینده
یاشیلار سسله نیر سندن یازاندا
جوشور طبعیم ائدیر غوغا خیالیم
سازیمدا دیلله نیر سندن یازاندا
محبت سن ٬ صداقت سن٬نه سن سن
کونول شیداله نیر سندن یازاندا
خمار گوزلر گلیر هر دن خیاله
خیالیم کئفله نیر٬سندن یازاندا
گزیر دیللرده شعری کاویانین
نواسی بلله نیر سندن یازاندا
+ نوشته شده در دوشنبه بیست و نهم آبان 1385ساعت توسط رحيم کاويان
|
نییه تک سن منی دیللندیریسن کیمسن سن ؟
شعریمین باغینی گولندیریسن کیمسن سن ؟
نییه تک سن آپاریرسان منی عشق عالمینه ؟
اوردا احساسی گوزللندیریسن کیمسن سن ؟
گوزلریندن جالادین کونلومه شعری٬ غزلی
منی بیر پارچا غزللندیریسین کیمسن سن ؟
باهارین عطرین آلیرسان و ئریسن باغچالارا
قیشدا دونیانی چیچکلندیریسن کیمسن سن ؟
هئچ بیلیرسن نه اویونلار گتیریرسن باشیما
منی اوز باشیما فیر لاندیریسان کیمسن سن ؟
گاه منی آتش هجرانه آتیب یاندیرسان
گاه گلیب گولدوروسن٬ دیدیریسن کیمسن سن ؟
کاویانین دگیشیرسن حیاتین دویغولارین
غصه لی عالمینی سیندیریسن کیمسن سن ؟
+ نوشته شده در شنبه بیست و هفتم آبان 1385ساعت توسط رحيم کاويان
|
تکجه سن بیل بونو ای جان٬سنه خاطیر یازیرام
ساری تئل٬گوز لری جیران٬ سنه خاطیر یازیرام
گئیدیرم سیر گولوستانه آچیلمیر اوره گیم
سن منه باغ و گولوستان٬ سنه خاطیر یازیرام
کاش بیلئیدین کی بو گونلر نئجه سنسیز له میشم
دور گل ای سرو خرامان سنه خاطیر یازیرام
نازنین سن منه وئردین باهارین مشتولوغون
عشق٬ گولندی تازاشدان٬سنه خاطیر یازیرام
شعریمین مطلعی سن٬ حسن ختامی سن سن
سن اولارسان منه جانان سنه خاطیر یازیرام
گوزلریندن جالانیر کونلومه شعریله شراب
الموشام مست و غزلخوان سنه خاطیر یازیرام
یونموشام مرمر شعریله سنین هیکلینی
غزلیمده قالاجاقسان٬ سنه خاطیر یازیرام ....
کاویانین غزلی مین گوزلی صید ائله دی
تکجه سن بیل بونو ای جان سنه خاطیر یازیرام ...
+ نوشته شده در سه شنبه بیست و سوم آبان 1385ساعت توسط رحيم کاويان
|
اينجانب م - آهني نظر به علاقه فراوان به شعرآذري تصميم به درج شعرهاي زيباي
استاد رحيم کاويان (شبستري) گرفتم و طي تماس با ايشان قرار شد که نظرات
و پيشنهادات شما خواننده عزيز با ايشان در ميان گذاشته شود و جواب سوالات
را خود ايشان ارائه نموده و من در اين وبلاگ درج نمايم . به اميد خداوند
متعال و با همکاري شما خواننده عزيز اين وبلاگ هر روز پربارتر خواهدشد .
+ نوشته شده در سه شنبه شانزدهم آبان 1385ساعت توسط رحيم کاويان
|
